I cuti de Portu Batiscu

I cuti de Portu Batiscu

8 ottobre 2013 di Pierluigi Camboa

Paola Beccarisi: Porto Badisco – Olio su tela 90cm x 70cm

Sta sse ‘nfila a mmenzu i cuti, ‘u mare,
An tru budellu du portu,
A mmenzu ‘e grutte spricate du tiempu,

Paramentu de l’ommu,
Ca scjia a caccia de cervi, cu le frecce
De fricciu pizzutu.
Oscji, su’ tanti ca stannu priscjiati
Assu i cuti ‘ntichi
De Portu Batiscu, quiru propiu
Ca ccose l’Eroe;
Quiru eroe ca, cainu, ‘a mansa
Ditone mmacau.
Virgiliu, percé?…
‘A principiu i Fenici e li Creci
Zziccasti mmacare;
Poi li Turchi, straminiusi e spiatati,
An tru nome de Allah.
Ma pe’ mie tie rrimani pe’ sempre
‘A Batiscu mia,
‘Runca ‘u ‘ndoru fascinante du passatu
Me nchiana alla capu,
Ogne fiata ca ieu vegnu cquai.
È duce, ‘u pinzieri!
Li beddri musi soi, mmasati e trimulanti:
‘U primu baciu ca li dia!
Poi, turnai cu mme ssettu assu molu:
La sintia presente
Ma capei ca lu tiempu ca è sciutu
Nun ci torna filu cchiui.
Testimoniu de fùrcite ‘mprese
De ommini ‘mmensi;
E de fatti ‘mpurtanti de cristiani
Nurmali, de casa loru.
‘Cquai ‘a luce de arba cchiu mprima
Culura l’Enotria;
Ma ‘a notte nun minte paura:
Zzica rride, ‘a luna,
E la gente – bbabbata – ’a cuarda
Ca se nazzica duce assu mare.
Poi ‘a Porta d’Oriente zzica cchiude
piatusa e l’ante e li scuri,
Ca li cuti fatati de Portu Batiscu
T’hannu fare sunnare.