Quanno chiove, areto ‘e llastre
io me ‘ncanto a guardà ‘a ggente
sott’all’acqua e ‘a tengo mente
pe’ vede’ che mossa fa.
Na pellicula ca corre:
tutt’a folla ca se ‘nfonne,
s’arrepara, s’annasconne;
tenne ‘e ‘mbrielle a se smerzà.
Schizze fitte ‘ncopp’ ‘e vvrecce
frìeno ‘e vvie dint”a tiella;
scioscia ‘o viento e na vunnella
se vo’ afforza sullevà.
E sta femmena gravante
scenne ‘a veste e se cummoglia,
dà nu passo e se scummoglia;
nun riesce a cammenà;
cchiù s’ammacca ‘e panne ‘ncuollo
cchiù s’abboffa ‘a tutt’ ‘e late;
scappa e piglia ‘nciampecate,
ce diverte e fa pietà!
E accussì na vicchiarella
sciancatella, malandata
pe’ passa’ ‘a na parte a n’ata
s’è vuluta arresecà,
ma currevano o’ccuntrario
na carretta e na carrozza:
scanza ‘a primma; ll’ata tozza
e fernesce p’ ‘arrutà!
Strille, trònole; nu lampo
fa celeste tutt’ ‘a scena:
‘nterra ‘a vecchia ch’è na pena
folla, attuorno, p’ ‘aiutà.
Sullevata: – Perde sango!
- Cu ‘a carrozza, è Pellerine!
- E avutate sti cuscine:
chiste ancora ‘aggi’ ‘a pavà!
E cu ‘o mantice acalato
sott’ ‘e rraffiche tagliente,
sta carrozza, chiena ‘e ggente,
‘ncopp’all’asse a s’assettà.
- Ccà se scassano ‘e balestre,
nun saglite tutte quante!
Ah! scennite! Va pesante:
‘animale non ce ‘a fa!
L’acqua ‘a fore e ‘o sciato ‘a dinto
se cancella ‘a visione.
Che triato è nu barcone!
Che spettacule po’ dà!
(Raffaele Viviani)