NINUCCIA
(Versi di Giambattista de Curtis, Musica di Vincenzo Valente – 1894)
Se dice che a Tuledo nc’è na rosa
ca, cchiù d’ ’o sole, li bellizze tene.
È sempe fresca, è sempe cchiù addirosa.
Tanto ch’è bella, chi v’ ’o ppò cuntà?
Io nun voglio gran cosa,
io nun cerco nu regno,
ma vurrìa chella rosa
sulamente addurà.
Io, si tenesse ’a voce e ’o ppoco ’e sciorte,
mme faciarrìa sentì cu ’sta canzone.
Ninuccia mia, pe’ te ne piglio ’a morte,
stu core nun se vò’ capacità.
Io nun voglio gran cosa,
io nun cerco nu regno,
ma vurrìa chella rosa
sulamente addurà.
Io passo pe’ Tuledo tutt’ ’e ssere,
’a guardo e nun mme stanco d’ ’a guardà.
’A penzo e nun mme lassa stu penziero
e, doppo muorto, chi s’ ’a vò’ scurdà?
Io nun voglio gran cosa,
io nun cerco nu regno,
ma vurrìa chella rosa
sulamente addurà.