Raffaele Pisani in Poesia.

IO SO’ L’ALBERO TUIO

Cammina
sott’’o sole d’austo,
e curre
ncopp’’arena cucente,
e, quanno
stanca te sentarraie
e guliosa ‘e cuiete
viene e reposete
sott’a chest’ombra,
io so’ l’albero tuio.

CENETTA A CAPO MULINI

‘A luna chiena dint’’o cielo blu,
a mare, int’’o silenzio, na lampara,
e tu, goccia d’estate, int’a sti braccia.

NNANZ’’O FFUOCO

Nnanz’’o ffuoco. Mo, parlanno,
mo mute,
mo mano int’’a mano,
mo luntano
ma sempe
scarfate ‘a stu ffuoco ch’appena
tu vide s’allenta
gravone nuovo subbeto ce miette,
e io so’ cuntento.
Nnanz’’o ffuoco. Mo, redenno
e mo serie,
mo carezze, mo niente
ma sempe
scarfate ‘a stu ffuoco ch’appena
io veco s’allenta
gravone nuovo subbeto ce metto,
e tu si’ cuntenta.

Featured image, caminetto, fonte Wikipedia.