9 giugno 2015 di Redazione
Salvatore Leone: Resti di Masseria, olio su tela, (80x160cm)
di Franco Melissano
Carasciùle te stelle mmenzu ncelu
sfastìtiane na luna penzierusa
ca nu sse fita cu se stèscia scusa
e cerca quarche nuvula pe vvelu.
Su’ fiuri ca li se spezza lu stelu
o su’ rimpianti astrali? Dimme, Musa,
ce bbete quista cosa misteriusa
ca pare quasi nnunziu te vangelu?
Ce bbole cu ci tice la natura
cu quistu scintillìu, cu ’sti fochi
ca, mancu faci ttiempu cu lli viti,
se ddùmane e fuscendu su’ spariti?
Li giurni ca ne ttòccane su’ pochi,
la rosa mprofumata pocu dura.