La canzune de li Babbarabbai

La canzune de li Babbarabbai

7 gennaio 2014 di Pierluigi Camboa

La calabrese (Pasquale Urso: incisione su rame)

‘O’ la sai ‘na cosa?…
Dimme, beddra mia!
… Me pare de veru ‘na puisia
E me prescjiu quannu ‘ici:
“Tie sinti ‘a vita mia”…

Quista è la canzune de li Babbarabbai:
Ci nun bo’ lla senti percé cazzu stai qquai?
A fiate lu pinzieri pare ‘nu cabbianu,
Abbre l’ale e vola comu a ‘n ariuplanu.
Ci de Uscjanu ho’ bbidi ‘u mare de mmane,
Pija ‘a bicicletta e ‘nchiana su’ ‘e Marciane.
A Casimasseddra e Uscjanu manci, bivi e gnutti:
Babbarabbà e Argerini fannu futti futti.

‘O’ la sai ‘na cosa?…
Dimme, core meu!
Vei aqquai cu’ mmie;
Ojiu te ‘manciu tutta:
Comu ‘a cchiù meju frutta…

Quista è la canzune de li Babbarabbai:
Ci nun bo’ lla balli be’… va banne de qquai.
A sutta puzzu cupu picchi pipe cape:
Sagne ‘nturtijate culle cime de rape.
Mesciu Totu mmisca ‘na gazzosa e birra,
Ma quannu poi ddarlutta pare ca spitterra.
Ttrova ca cchiù tardu ne scinnimu a Badiscu,
Ca è bonu ne mintimu cullu culu an friscu.

‘O’ la sai ‘na cosa?…
Dimme, beddra mia.
Nun ede ‘na paccia:
Me sentu ‘na rriggina
Cu stau cu’ ssignuria.

Quista è la canzune de li Babbarabbai:
Ci la canti e balli te ne nnessi ‘e ‘ntri cuai.
Quandu ieu te penzu me batte forte ‘u core :
M’ha’ ittu lu duttore ca è curpa de l’amore.
Te viscju ca te sta’ nazzichi sull’artalena:
Mamma cce si bbona, mescia Maddalena.
Ma quannu ieu me sentu cu llu core an canna,
Me ncummu ‘nu bbuccacciu de nutella e panna…

Na fiata a Uscjanu nc’erane tre puteche ‘e mieru:
Alla via Roma, a via Badiscu e a via Santa Lucia.
Nc’era ’nu ndoru comu Ddiu cumanna
Ci te ssittavi fore te ‘mbriacavi francu.
Tiraletti de tabaccu a siccare a mmenzu ‘a via.
Cunserva ‘mara e fiche de costi ccasa mia:
Friseddre e pimmidori, ‘na punta d’oju e sale:
Ddri tiempi n’i sunnamu, carissimu cumpare…

Quista è la canzune de li Babbarabbai:
Ci nun bo’ lla senti percé cazzu stai qquai.
Quista è la canzune de li Babbarabbai:
Ci nun bo’ lla balli be’… va banne de qquai.
Quista è la canzune de li Babbarabbai:
Ci sa’ la canti e balli te ne nnessi ‘e ‘ntri cuai.
Quista è la canzune de li Babbarabbai:
Ci nun bo’ lla senti percé cazzu stai qquai.