Ruve-ài

Dapertutu u se ve' ruve-ài
cròve se bèle fasce unde ùna vòuta
u sentivamu sugiar e cantar
chi travagliava en te e vie cun a màchina
deu sulfatu ch'a persava sce e spale
e u parescìa ch'a piturèsse e foglie
per abelie u cadru dea campagna.
E gènte e desciarmentavan cuntènte
de ver cresce i rapi d'ua ancùn verdi...
    A stagu a ver lagiù versu u Ciapìn:
i ruvèi i fan da padrùi deu mundu
dopu ch'i s'han mangiàu tutu u camin
e aùr nesciùn u se proa ciù a andarghe.
Ma se escì e spine e purèssen parlar
e ne cuntarìan a storia dei orti
per regurdar e pumate già rusce
veixìn ae cabanète dei faixoi
e ai ciucài cièi de grosse asciùre giale,
e ne cunterìan de tante fatighe
cunsumaè per nui da brassi amurursi...
    U me par de sentierli cheli brassi
e a vurerìa baixiàrle chele mae.
Teresa Martini Veneruso
Poesie en Brigalencu