"Il grande inganno" in Tàtari e in Irgoli

Cras a sas 17,30 in sa libreria Odradek de Tàtari, in sa Carrela de Torre tonda, 42, su diretore de Logosardigna Bèrtulu Porcheddu e sa diretora de sa libreria Rita Marras ant a presentare su romanzu meu "Il grande inganno", èditu ocannu dae Consaghes.
Su libru at a èssere presentadu chenàbura, su 20 a sas sete de sero finas a Irgoli in sa Biblioteca comunale, in carrera de Lamarmora. L'at a presentare Paulu Pillonca.
Mi so ispassiadu a immaginare ite diat èssere capitadu si su 17 martzu de su 1861, su Parlamentu de su Regnu de Sardigna no aiat aproadu su disinnu de lege de Cavour chi, cun un'artìculu e bia cantzellaiat su Regnu de Sardigna nàschidu in su 1324 e lu cambiait in Regnu de Itàlia.
Unu romanzu de fantassièntzia chi tenet a teatru unu mundu, un'Itàlia e una Sardigna parallelos in ue totu càpitat comente est capitadu in sa realidade chi connoschimus, francu carchi cosa: su Vaticanu non cheret sa unidade de sos istados italianos e faghet a manera chi su disinnu de lege de Cavour non cròmpat a su Parlamentu.