La storia [parabola] del fîgh senza fiurón

Gesü äl discùrra sura di fât pena capitè (1-5)

Soquânt òmän i van da Gesü a cuntärägh che Pilato l’äva fât mäzèr di Gälilei, propria intânt chi säcrificävän èl bestij; sangäv sura sangäv. Gesü äl ga dîž: « Pensäv che ch’j’òmän lé i siän a-stè pü delinquênt che ch’j’ätar, parché j’en a-stè mäsäcrè äcsé? No, cära! Anzi, sè cämbiè mîa vita, farì la stessa fen. E chi dèždòtt ch’é stè schissè sùtta èl turrión äd Siloe, pensäv chi gh’ävessän di dêbit pü gròss che ch’j’ätar äd Gerusalemme? No, cära! Mo äv gäräntiss ca sè cämbiè mîa vita, farì la stessa fen ».

Gesü äl conta la storia [parabola] del fîgh senza fiurón (6-9)

Pò Gesü äl conta c’la storia ché: « Von äl gh’äva un fîgh int la sò vigna e äl va par cätèr-sö soquânt fiurón, mo nè gh n’era mîa. Älura äl dîž äl mžädar: J’en tri ân ca ven ché par cätèr sö i fîgh e gh n’é mäi. Röšga la pianta! Ala da t’gnîr änmè che del sîd? Èl mžädar äl dîž: Siûr pädrón, lasla ché anmò pr ist ân! Ägh vöi säpèr ben däturna, pò agh mött èl šgiüž. S’la darà, bon… Se no, la šgarùma ». 
Da "La Bon'na Növa" Lc 13, 1-9


("La bon'na Növa cuntäda da Luca 13,1- 9


Da "La bon’na nòva". I 4 Vangeli e gli Atti degli Apostoli tradotti dal Vangelo canonico in borghigiano da Claretta Ferrarini – Gli Amici del Togo Fidenza - In brossure, formato 16,5 x 23,5 pp. 316