Sentidos, cussèntzia e polìtica

De sos “collegas” bloggers chi sigo totora in sos artìculos issoro, petzi Roberto Bolognesi s'est abbigiadu de sa cherta universitària a pitzos, naramus·li gasi, de s'identidade de sos sardos. E giai in su tìtulu “Tra il dire e il fare” pesat una chistione manna: Comente est chi indipendentistas e soveranistas pro s'88 pro chentu a su nàrrere issoro, cando si tratat de botare non botant a sos partzidos e a sos moimentos indipendentistas e soveranistas? Sa prima imposta est gasi bamba chi non b'at su tantu de l'arresonare a finu, ma nessi cheret parada: unu contu est unu sentidu e unu contu est una cussèntzia. A unu sentidu indipendentista non currispondet una cussèntzia indipendentista. Ma b'at, a pàrrere meu, una chistione prus de bundu: sa polìtica, e duncas sos partzidos chi la faghent, no est intesa comente unu istrumentu a gradu de atuare, de prenare de cosas cuncretas unu sentidu. Penso a beru chi culturalmente sos sardos siant de s'idea chi una Sardigna indipendente o soberana siat sa cosa mègius, a gradu de los fàghere si non ricos, pròsperos. Su raju est chi non b'at a fùrriu progetos de indipendèntzia e/o de soverania chi remirent interessos econòmicos, polìticos e culturales de sas chentu concas e de sas chentu berritas. E sos chi bi sunt, o sunt economitzistas, sena peruna istima pro sos sentidos identitàrios, o sunt idealmente minoritàrios, istorchende sos moimentos narados antagonistas, o sunt tentos dae su berme de sa “frenèdiga rivolutzionària”. Cada una de custas alas tenent, est craru, unu bellu tantu de resone, e duncas de simpatias finas eletorales, ma no unu progetu de guvernu de una sotziedade intritzida e cumplessa che a sa sarda. B'at in caminu una pariga de ideas de comente pònnere paris unu progetu de comente pònnere a pare fortzas chi punnent a mudare su raportu Sardigna-Itàlia. Una est sa chi su Partzidu sardu at propostu a su Consìgiu regionale, botada dae sa maioria de sos deputados. Una proposta aberta a totus chi punnaiat a retzire votos sena istare abbistende su colore e chi, gasi, at collidos su chi eja a dereta, a su tzentru e a manca e su chi nono a dereta, a su tzentru e a manca. S'àtera idea est sa chi Irs est faghende isseberende in antis de totu sos cumpàngios de biàgiu. O de gosi o de gasi carchi cosa s'est moende e bae e chirca, si podet dare chi su sondàgiu de sas universidades sarda e iscotzesa e s'àera noa chi s'est intendende siant ispuntorgende sa polìtica e chi, duncas, intre su de nàrrere e su de fàghere su mare si siat retirende.