Si nch'est mortu Micheli Columbu

Dal sito di Fondazione Sardinia

Micheli Columbu si nch'est andadu. E sos sardos amus pèrdidu unu babbai de prànghere e de festare pro sos donos polìticos, culturales e linguìsticos chi nos lassat. In tempos che a custos, cando meda polìticos sardos s'ismèntigant de èssere fìgios de Sardigna chimbe minutos a pustis brincadu su mare, òmines che a tziu Micheli nos ammentant chi si podet istare in su Mundu cun sa carena e in Ollollai e in Sardigna cun sa conca e cun su coro. Nàschidu e pàschidu in Ollollai, Columbu s'at leadu in fatu, in sas atividades polìtica, culturale, amministrativa e finas linguìstica, su sentidu irònicu chi est su chivu de sa cultura de sa bidda sua, in su coro de sa Barbàgia. At fatu su sìndigu, su deputadu in Roma e in Brussellas, semper pro su Partidu sardu, ma est mescamente pro custa balia irònica chi l'ammento, aende tentu su mandu de lu connòschere e de l'abitare, mancari non cantu aia disigiadu de fàghere. Fiat una balia, sa sua, una capatzidade de pònnere a s'alerta a totus: mirade chi nos est trampende a chie narat de tènnere su beru in bèrtula. Connoschiat sa limba sarda in totu sas pinnigas suas e fiat maistru de s'antìfrasi. M'ammento unu librigheddu chi aiat iscritu contende ite podet capitare impreende antìfrasis intre duas persones de sentidos diferentes. Unu, Micheli e totu, chi chircat de cumbìnchere s'àteru chi “s'ogru puntu tenet” non cheret contare de unu cristianu chi tenet s'ogru guastu, ma totu a s'in contràriu. Chi est abbistu e biet bene meda. Custa manera de faeddare – chi non fiat petzi de istorieddas, craru, ma de chistiones polìticas e sotziales – andat bene si in unu partzidu si impreant limbàgios che pare. Andaiat bene finas cando, comente in su cumintzu de sos annos de Setanta, su Psd'atz fiat unu partzidu in ue, mancari a briga, si faeddaiat una limba pròpia. Non cando, crèschidu finas a tènnere sa Presidèntzia de sa Regione, su “politichese” nch'aiat catzadu s'antìfrasi e, cun custa, sa capatzidade de faeddare unu limbàgiu cumpresu dae sos sardos. At a èssere pro custu puru chi Micheli Columbu medas bias est istadu a làcanas de su partzidu chi, in tempos tristos e cun pagos àteros, at tentadu pro no lu fàghere mòrrere.