Unu cafè intritzidu meda

de Isteddu de su mangianu e de su sero
At a èssere chi est ingulimadu dae su callente de sa tziminera o dae su fumu de sa pipa. O si podet dare chi siat su cafè, cun unu gùtiu de late càbrinu. Siat ite si siat, millu inoghe. Mi chistionat de Atropa e de s’Egitu ma s’istrachitùdine chi mi leat cando lu bido e l’intendo mi ingàddinat. Mi annèulat origras e ogros, est s’istrachitùdine de sos sèculos de s’Antigu. Chentinas de annos biagende peri sos mundos. “Ampara·la. Galu no at cumpresu nudda, e però at a cumprèndere.” Mi intregat in manos una fotografia: est unu boe tomasu, ispantosu, mannu mannu: 3,5x1.6x2.5 tzentìmetros. In pitzos b’at geroglìficos e un’iscrita in un’alfabetu antigu. Sos deos de s’Egitu e unu re pitzinnu. Benit dae Sant’Antìogu, collida Biggio: gasi paret. Est mai possìbile chi su cafè cun late càbrinu imbriaghet? "Ello? e tando?" imbabusino deo. "E tando eja, gasi est. Prus a prestus, dae cara a sa pitzoca". L'apo a fàghere, murmuto deo in su mentras chi s'imberghet. Marranu chi l'apo a fàghere.