Tema : Stidduzza mia

Sez Mi sono innamorato di te perchéSvolgimento
Stidduzza mia,
ma che facisti? Ma che cumminasti?
Mi scrivisti che mi vò lassari! Mi veni i chianciri solu a ‘stu pinzieru.
Com’è che ti vinni ‘ntiesta sta pinzata? Ma chi t’aiu fattu?
Quann’è che ‘u liggivi, mi si grapiù un pirtusu ‘mmezzu de lu pettu.
Mi misi a chianciri lacrime amare. Ma non comu chidde che tante volte ‘nzemmula amu chianciuto, di gioia e di duluri, ne lu mentre che ci strincievamu abbrazzati.
E quantu ‘nnamu viste ‘na tutti ’sti anni! Ma sempre io cu ttia e tu cu mmia, stritti stritti, vucca cu’ vucca, ciatu cu’ ciatu, manuzza e manuzza; a dirici parole che ci paria solu i picciuttedi che s’ingrizzano pà prima vota si ponnu dire.
Quante stidde amu cuntatu ‘a notte appizzate na lu cielu! E io ‘na stidda ‘a chiamavu cu to’ nnome, e tu na’ stidda ‘a chiamavi cu’ nome miu.
E quantu friscu nnamu pigghiatu e quanti dulura!
Tu mu’ dicia sempre: “Totuccio, unnè cosa: Un semu chiù picciotti. A sira si iecca l’umido, e un putiemo stari accussì, assittati ‘nne panchine o ‘ncapu a sabbia vagnata. U’ sacciu pure io: Munnieddu è propriu bedda e ‘ste siratine so’ megghiu assai da’ televisione; ma dumani matina un ti po’ susiri e ‘un ti pò mettiri a’ gritta; agghiorni tuttu aggranchiatu e io t’è sientire a lamintariti pì jurnate sane!”
Saruzza mia, tu raggiune avia: oramai su’ fattu viecchio e a momenti un’ mi pozzu cchiù catamiari; ma unn’è giustu però ca nall’ultimi tempi tu mi sfuttia sempri, e mi dicia ch’era addiventatu tuttu siccu, sciancatu, immurutu e sganguliatu.
E quanno di pomeriggio ni facevamu a passiatina ‘nno corso principale, un c’era vota che un mi rinfacciavi: “Arrieri ‘e picciuttedde in minigonna ti talii? A ttia stannu pensannu ! Aqquietati; tu a chidde un’ ci pò’ curriri appriessu mancu cu’ l’occhi !”
“E che male c’è a taliari? – t’arrispunnia - Almeno m’ arifazzu a' vista. Ma tu ca parri, ti viristi ‘o specchio accomu t’arriducisti? Si' tutta panza, minne caruti e culu grosso quant’a ‘na casa!”
Certo ca ‘u tempu passò e oramai unn’era cchiù come ‘na vota. ‘A casa addiventò vacanti e no’avutri, pi passarici i iurnati, n’appimo a ‘nvintarici ‘na qualche cosa.
Io, nna vecchiaia, m’insignai u’ computer, accussì mi putia sentiri n' anticchia giovane, e tu ti mittisti a sferruzzari magghiuni ca’ un si pò mettere nuddu, cucinari piattuni chini chini ‘i grasso e uogghio fituso che m’inchiummavano e m’intussicavano bbuono bbuono e t’insignasti a fare di’ bedde torte, che u’ sacciu solu io quanto mi ficiro acchianare u’ zucchero e dì cabbasisi i’ trigliceridi!
Finiu pure che da li vasati di ‘na vota, arrivammo ‘e sciarre d’ogni gghiuorno. E tante furono i vasate, tante addiventarono i sciarre. Sino a quanno ‘na matina (un mu puozzu scurdare), ti susisti e mi dicisti: “Io, mi ni torno ‘nni me’ matri!”
“Ma unni…e’ Rotoli? To’ matri avi vint’anni ca’ muriu!”
Ma u dicisti e u facisti; mi lassasti cà, solo com’un fissa, e t’innisti ‘nna casa vacanti di quann’eri picciuttedda schietta.
Ora, sparte, unn’u sacciu com’è ca’ ti vinne ‘sta pinzata, mi turnasti pure tutti i gioielli d’oro e d’argento ca’ ti fici quann’eramo ziti e pure maritati, e mi scrivisti che t’è mannare subito n’arrieri tutti i riali ca mi facisti e pure tutti ‘i fotografie, unne ci si tu o unne ca’ semo ‘nzemmula.
A parte u’ fattu ca’ tu un’m’arrialasti mai niiiiente…, i fotografie i misi tutte pare pare nno’ computer e sunno pure su Facebook e Youtube; accussì cu’ unnu vole sapire unn’u sape tuttu chiddo camu fattu ’nzemmula.
Ma , alla fine, mi futtisti… mi lassasti n’anticchia prima che ti lassassi io! Pi cchistu mi vinni i’ chianciri quann’è cu’ liggivi.
Però,…pinzannuci bbuono: unn’ama gghire io e tia, oramai !? Un facemu futtiri i ridere a spartirici a ottant’anni?
Un fussi megghiu che t’arricampi e Veni cà’? A passare un poch’i cannavazzu ‘na ‘sta casa che sta fitiennu, china china i’ provulazzu, e macari mi cucini n’a poco ‘i caponta bella chiummusa e china d’ogghiu, come a sa’ fari tu, na para di chila di pasta chi sarde e pure i vruocculi arriminati, na’ poco i gaddozzi di sazizza e, chi sacciu… quattro belli sarde a beccaficu. Accussì, macari,pozzu moriri saziu, ca’ panza bedda china!
   Totuccio tuo, che ti vole sempre bbene.  
Sabino Russo